Музейныя падрабязнасці з Пінкавіч

“Чаму падрабязнасці?”- спытаеце вы? А таму, што ў музеі амаль кожная дробязь уяўляе сабой каштоўнасць, і менавіта цікавыя,таямнічыя падрабязнасці падчас экскурсіі заварожваюць  наведвальнікаў нашага сапраўды народнага музея.  Нават улетку наш музей не перастае сустракаць экскурсантаў.  А колькі сенсацыйных падзей …

Не так  даўно экспазіцыю «Сялянскай хаткі» папоўнілі каштоўныя экспанаты.  А было гэта так… У Вішавічах, па-суседству з нашай супрацоўніцай Гурынай Аленай,  разбуралі старую хату.  Паколькі ў нашым  калектыве ўсе неабыякавата ставяцца да  дзейнасці  музея,  Алена не змагла прайсці міма рарытэтаў, якія будаўнікі жбурлялі з гарышча разам з векавым хламам.  Плецены з лазы чамадан, саламяныя чуні-буркі, шматфункцыянальны кошык… І, уявіце сабе, ўсё у адносна добрым стане.

Прыемна, што амаль штодня на тэрыторыі музея чуваць дзіцячыя галасы. Дзетвара з прышкольных лагераў з задавальненнем наведвае  мерапрыемствы у музеі. Экскурсія па вёсцы “Коласавымі сцежкамі” запала ў душу нават мне  самой. І вось чаму:  напачатку экскурсіі ўзяў мяне за руку хлопчык з Высокаўскай сярэдняй школы Жуковін Кастусь. (Пагадзіцеся, цёзка песняра-  носьбіт даволі рэдкага імя ў наш час.) І гэты надзвычай эрудыраваны экскурсант натхніў мяне на імправізаваную экскурсію.  Як было не ўявіць маленькага Кастуся  Міцкевіча з яго прагай да навукі,  імкненнем з’яднацца з прыродай…

Каб часам не забыць сказаць яшчэ аб адным (як цяпер модна называюць) крэатыўным моманце экскурсіі: за музеем “схаваліся “формы малой архітэкуры, выкананыя у адным стылі з музеем.  Гэта калодзеж Якуба Коласа з інфармацыйнай шыльдай на дзвюх мовах (беларускай і англійскай) і   альтанка (русск.-беседка).  Не паспеюць дзеці яшчэ усесціся за утульныя лаўкі у альтанцы,  як ўжо заяўляюць: ” Мы адсюль нікуды не паедзем!” . Дарэчы, вясковую утульнасць нашага музея адзначаюць усе наведвальнікі.

Сапраўднай  кульмінацыяй летняй музейнай кампаніі стала сустрэча  з вядомым  пінскім  бардам Аляксеем Шаўчуком.  Рэпертуар, прысвечаны Году малой радзімы,  спадабаўся вучням Купяціцкай СШ, Пінкавіцкай СШ, СШ №12. У вестыбюлі музея панавала  атмасфера любові, шчырасці, дабразычлівасці, якой так не хапае нам у штодзённым жыцці. 

Вас закранулі нашы падрабязнасці? Дык у чым справа? Народны літаратурна-краязнаўчы музей рады вас заўжды вітаць.

Метадыст ДУА “Цэнтр творчасці дзяцей і моладзі ” Пінскага раёна Жанна Верыч.